मधेसखबर
वीरगन्ज,०५ कार्तिक : पर्साको जिराभवानी गाउँपालिका वडा नम्बर २ स्थित लाटोमाइ मन्दिर नजिकै अटोरिक्साको ठक्करबाट एक जना सशस्त्र प्रहरी घाइते भएका छन् । सशस्त्र प्रहरी बोर्डर आउट पोस्ट महादेवपट्टीका इन्चार्ज सशस्त्र प्रहरी निरीक्षक रमेश साख घाइते भएका हुन् ।
हात भाँचिएको उनको वीरगन्ज स्थित नारायणी बयोधा मेडिसिटी अस्पतालमा उपचार भइरहेको छ । लाटोमाइ मन्दिर नजिकैको सडकमा शुक्रबार राति नेपाल प्रहरी र सशस्त्र प्रहरीले सवारीसाधनको चेकजाँच गर्ने क्रममा सुवर्णपुरबाट आउँदै गरेका ना २ ह १४५४ नम्बरको अटोरिक्साले साखलाइ ठक्कर दिएको हो । अटोरिक्सा चालकले मादक पदार्थ सेवन गरेका कारण दुर्घटना भएको सशस्त्र प्रहरी नायब उपरीक्षक सन्तोष बस्नेतले बताए ।
ठक्कर दिने अटोरिक्सा सहित त्यसका चालक जगरनाथपुर गाउँपालिकाकै वडा नम्बर १ घर भएका सीताराम रायलाई सशस्त्र प्रहरीले नियन्त्रणमा लिएर इलाका प्रहरी कार्यालय सेढवामा राखेको छ ।