मधेसखबर
साउन ३० , वीरगञ्ज । नेपालमा कोरोना भाईरसको संक्रमणबाट मृत्यु हुनेको संख्यामा वृद्धि हुन थालेको जनाईएको छ ।
आइतबार मात्रै कोरोना भाईरसको संक्रमणबाट दुई जनाको मृत्यु भएको स्वास्थ्य तथा जनसंख्या मन्त्रालयले जनाएको छ ।
नेपालमा चौथो लहर सुरुवात भएपछि मृत्यु हुनेको संख्या क्रमिक रुपमा बढ्दै गइरहेको मन्त्रालयले जनाएको छ ।
कोरोना भाईरसको संक्रमणबाट १ साउनमा पहिलो संक्रमितको मृत्यु भएको थियो । त्यसयता दैनिक एक–दुई जनाको मृत्यु हुँदै आएको छ भने गत २६ गते एकैदिन पाँच जनाको कोरोना भाईरसको संक्रमणबाट मृत्यु भएको मन्त्रालयले जनाएको हो ।
साउनयता हालसम्म ३६ जनाको मृत्यु भएको स्वास्थ्य मन्त्रालयको तथ्यांकमा छ । मृत्यु हुनेमा अधिकांश खोप नलगाएका र दीर्घ रोगी रहेका मन्त्रालयका प्रवक्ता डा. समीर कुमार अधिकारीको भनाई छ ।
अधिकारीका अनुसार संक्रमणबाट मृत्यु हुने ७५ प्रतिशत भन्दा बढीले खोप नलगाएको पाइएको छ । खोप नलगाएकाहरू उच्च जोखिममा रहेकाले आफ्नो नजिकैको स्वास्थ्य संस्थामा सम्पर्क गरेर आवश्यकता अनुसार कोरोनाविरुद्धको पहिलो, दोस्रो र बुस्टर मात्रा खोप लगाउन मन्त्रालयले अपिल समेत गरेको छ ।
कोरोना भाईरसको संक्रमण बढ्दै गएकोले मानिसहरुले फेरी पनि उच्च सतर्कता अपनाउन आवश्यक रहेको नारायणी अस्पतालका वरीष्ठ चिकित्सक एव् प्रवक्ता डा.उदय नारायण सिँहले सुझाव दिएका छन् ।
