मधेसखबर
वीरगन्ज, ०४ कार्तिक : पर्सामा राष्ट्रिय निकुञ्जले पालकै हात्तीको आक्रमणबाट एक माउतेको मृत्यु भएको छ ।
मृत्यु हुनेमा बाराको जितपुर सिमरा उप–महानगरपालिका वडा नम्बर ५ डुमरवाना घर भइ पर्सा राष्ट्रिय निकुञ्ज कार्यालय अन्तर्गत रामभौरी भाठा सेन्टर गढुवा लाइन पोष्टमा करारमा कार्यरत ३१ वर्षीय रमेश महरा रहेका छन् ।
शुक्रबार दिउँसो कामिनीकली नामक हात्तीलाई चराएर ठोरी गाउँपालिका सुवर्णपुर स्थित हात्तीसारमा बाँध्ने क्रममा महरालाई त्यहि हात्तीले आक्रमण गरेको थियो ।
हात्तीको आक्रमणबाट गम्भीर घाइते भएका उनलाई तत्कालै प्रहरी चौकी सुवर्णपुरबाट खटिएको प्रहरी टोलीले उद्दार गरेर वीरगन्ज स्थित मेडिसिटी बयोधा अस्पतालमा उपचारका लागि ल्याएको थियो ।
उपचारको क्रममा महराको शुक्रबार अपरान्ह साढे ४ बजे मृत्यु भएको पर्साका प्रहरी प्रवक्ता प्रहरी नायब उपरीक्षक दीपक गिरीले जानकारी दिए ।
