मधेसखबर
वीरगन्ज, २१ कार्तिक : मंसिर ४ मा हुने निर्वाचनलाई लक्षित गर्दै पर्साको ठोरी गाउँपालिकामा नमूना मतदान गरिएको छ । जिल्ला निर्वाचन कार्यालय पर्साको आयोजना तथा ठोरी गाँउपालिकाको सहयोगमा सोमबार नमूना मतदान कार्यक्रम सम्पन्न भएको हो ।
ठोरी गाउँपालिकाको कार्यालय घ्याङडाँडामा सम्पन्न नमुना मतदान कार्यक्रममा सहभागी मतदाताले प्रदेश र प्रतिनिधीसभाको जस्तै प्रत्यक्ष र समानुपातिक गरि ४ पटक मतदान गरेका थिए । जिल्ला निर्वाचन कार्यालयले मतदाता शिक्षा दिने र मत बदर हुने अवस्थाको बारेमा बुझ्न नमुना मतदान गरिएको नमूना मतदानका लागि ठोरी गाँउपालिकाका सम्पर्क व्यक्ति भुपाल कुमार जोशीले जानकारी दिए ।
नमूना मतदानमा पर्साका प्रमुख जिल्ला अधिकारी उमेश कुमार ढकाल ,ठोरी गाँउपालिकाका अध्यक्ष लाल बहादुर श्रेष्ठ , उपाध्यक्ष गोकुली कुमारी रेग्मी , पर्साका मुख्य निर्वाचन अधिकृत विनोद कुमार पोखरेल , जिल्ला समन्वय समितिका निवर्तमान उपप्रमुख ठाकुर प्रसाद न्यौपानेका साथै वडाध्यक्ष, विधार्थी र स्थानीयले पनि मतदान गरेका थिए ।
नमुना मतदान गर्ने क्रममा सहभागी मतदाताहरुलाई मतपत्रमा स्वास्तिक छाप लगाउन , मतपत्र पट्याउन , चार वटा मतपत्र मध्ये कुनमा पहिले , कुनमा दोश्रो , कुनमा तेश्रो र अन्त्यमा कुन मतपत्रमा कसरी स्वास्तिक छाप लगाउने बारेमा सिकाइएको सम्पर्क व्यक्ति भुपाल कुमार जोशीले जानकारी दिए।
सुरक्षा व्यवस्था सहित वास्तविक निर्वाचनको झल्को दिने गरी सम्पन्न नमुना मतदानको नेपाली सेना , नेपाल प्रहरी , सशस्त्र प्रहरी लगायत पर्साका सबै सुरक्षा निकायका प्रमुख सहितको टोलीले अनुगमन पनि गरेको थियो ।
