मधेसखबर
वीरगन्ज,२२ असोज : सत्ता गठबन्धनमा लोकतान्त्रिक समाजवादी पार्टी (लोसपा)ले प्रतिनिधिसभाका ८ र प्रदेशसभा तर्फ १६ सिट पाउने भएको छ । शनिबार बिहानदेखि प्रधानमन्त्रीको सरकारी निवास बालुवाटारमा भएको नेपाली कांग्रेस र लोसपाका नेताहरुबीचको छलफलले लोसपाले प्रतिनिधिसभाका ८ सिट र प्रदेशसभाका १६ सिट लिने गरी सहमति जुटाएको हो ।
तर लोसपाले कुन–कुन क्षेत्र लिने भनेर अझै छलफल जारी नै रहेको लोसपाका नेता लक्ष्मणलाल कर्णले जानकारी दिए । जसका कारण पर्साको क्षेत्र नम्बर १ कसले लिने भन्ने अझै टुङगो लागि सकेको छैन । पर्साका ४ प्रतिनिधीसभा क्षेत्र मध्ये २ , ३ र ४ काँग्रेसले लिने लगभग पक्का भइसकेको भए पनि पर्सा १ का बारेमा दुवै दल बिच अहिले पनि छलफल जारी नै छ ।
नेता कर्णले भने ,‘ गठबन्धनमा हामीले प्रतिनिधिसभाका ८ र प्रदेशसभाका १६ सिट लिने सहमति भएको छ , हामीले रोजेर सिट लिन्छौं, बाँकी उहाँहरुले उम्मेदवार उठाउनुहुन्छ,’ ।
सत्ता गठबन्धनमा लोसपा सहित कांग्रेसले प्रतिनिधिसभाका ९८ सिट पाएको थियो । लोसपालाई ८ सिटमा मनाएपछि कांग्रेसको भागमा अब ९० सिट परेको छ ।
गठबन्धनमा नेकपा माओवादी केन्द्रले ४७, नेकपा एकीकृत समाजवादीले १९ र राष्ट्रिय जनमोर्चाले २ सिट लिएर सहमति भइसकेको छ । साभार :कान्तिपुर
